انا احب اشوف ايش الناس خلصوا من منتجات و ايش رأيهم فيها لانه يكون رأيهم الصريح لانهم خلصوا المنتج .اليوم حبيت اشاركم بمنتجات خلصتها و ايش رأيي فيها و لو حشتريها ثاني٠
( منتجات الجسم (من اليمين لليسار
- كريم اليد من اركو نم بريحة المنجا من افضل كريمات اليد اللي جربتها دايما اشتريه لانه يتشربه البشرة بسرعة و ريحته جميلة
- كريم الرجول من بوتس اللي عجبني فيه انه ريحته مو زي باقي كريمات الرجول ريحته على فنيلا بس حسيته مرة ثقيل فما احس حشتريه ثاني
- زبدة الجسم من سوب اند جلوري من الاشياء اللي ما استغنى عنها لانه مرة خفيف مو زي باقي زبدات الجسم و ريحته خيالية لازم تشموه في بوتس و تعرفوا اني احبه لاني خلصت هذه العلبة الكبيرة و أكيد حشتريه ثاني ان شاء الله
- كريم الجسم من تري هات ما احس حشتريه ثاني لانه مو مرة حسيت يرطب الجسم و ريحته ما عجبتني
منتجات الشعر
- احب استخدم شامبو جونسن لفرش المكياج لانه ينظفهم مرة كويس و كمان ما يخليهم ينشفوا
- بلسم الشعر من اوسي من المفضلات عندي لانه يخلي التمويجات في شعري تبان اكثر يرطبها و دايما اشتريه اذا سافرت برة
- كريم الشعر ٥ في ١ من ليفينج بروف استخدمه بعد الشاور و يخفف النفشة في شعري وريحته حلوة ما صرت استغنى عنه و اشتريته بحجم اكبر
- سيروم الشعر من ليفينج بروف ما حبيته مرة حسيت الكريم احسن
منتجات البشرة
- كريم فيرست ايد من افضل الكريمات عندي لانه ثقيل بس يمتصه البشرة بسرعة و من جد يرطب البشرة و صار دايما موجود عندي
- ماسك الوجه من دكتور ج جالي في علبة جلامبوكس و حبيته ،يرطب الوجه و مريح عالبشرة بس ما احس حشتريه ثاني
- مزيل المكياج من نيفيا مرة كويس و يشيل المكياج بسرعة و ما يحرق عيوني و زي ما تشوفوا خلصت ٢ منه
- ماسك الوجه من جلام جلو جميل يرطب و ينظف البشرة بعمق بس احسه شوي ينشف البشرة
- كريم الوجه من لوريالعجبني و جبته لما خلص كريمي من فيرست ايد بس طبعا ما يرطب مثل فيرست ايد بس كان حلو و بارد عالبشرة حبيته بالصيف
- جل الحواجب من بودي شوب كنت احبه زمان بس مع الوقت صرت اكرهه لانه احسه يصير يسوي طبقة عالحواجب تتقشر
- كريم الاساس من ماركس جيكوب ، من المفضلات عندي مرة طبيعي عالبشرة و تغطيته حلوة وانشالله حشتريه ثاني
- مسكرة بكسوم احبها لانها تعطي طول لرموشي و احسها حلوة للصباح و اشتريت منها حجم كبير
- مسكرة رولر لاش من بينيفت حبيتها لانها من جت عكفت رموشي بس ما حسيتها اعطت كثافة
- بتر ليب من ريفلون درجة ٠٥٠ مرة حبيته و خلصته لانه كان يرطب الشفايف و لونه جميل بس يسيح بسرعة بالصيف
- روج بينيفت skinny dip حبيته و لونه مرة طبيعي و مرة مرطب بس مشكلته مرة طري لدرجة اوقات يسيح برة الشفايف و بالصيف مرة ساح ما صرت اقدر استخدمه
- روج ٤٦٠ من ريفلون من الاساسيات عندي احسه مرة يناسب بشرتي و ينفع لكل يوم و خلصته كله و طبعا تركيبة ارواج ريفلون مافي عليها كلام
- مرطب الشفايف من اوريفليم،من الاساسيات عندي كمان و من احسن المرطبات بنظري
- توب كوت مات من بورجواه احبه بس احسه يقشر المناكير بسرعة
- بودرة تحت االعيون من الف طفشتكم فيها في انستجرام لانها مرة مويسة و تحل مشكلة تخطيط الكونسيلر تحت العيون
- مرطب الشفايف سوفت ليبس حبيته و حسيته احسن من اي او اس بس بعد قترة نشف و صار ما يرطب
- بوزي تنت من بينفت من بلشراتي المفضلة مرة يليق مع البشرة الفاتحة و يعطي شكل مرة طبيعي
No comments:
Post a Comment